2017年6月4日 星期日

Day 19南極第十站──Cierva Cove


**南美、南極篇使用粵語


Blog荒廢咗差唔多兩個月喇,好離譜添,破壞咗自己訂嘅兩個星期的約定,跟住落嚟我諗會得閒啲喇卦,希望真係會啦,不過我唔敢應承自己同大家喇,只可以話我心底係有記住兩星期的約定架!


寫到南極郵輪嘅尾聲喇,呢日原本打算land Trinity Island以南嘅一個小島,後嚟等咗成朝都land唔成,於是又派個安慰獎,由landing變成cruising。好過冇啦,即係我哋南極之旅嘅最後一次登岸就係上篇寫嘅Port Lockroy,而最後一次遊覽就係今篇喺Cierva Cove嘅船河。呢個boat cruise有一大收穫,就係終於好清晰咁影到企鵝游水,佢哋好高速架,超難影,總算臨走前影到喇!


Day 19,最後一次睇我深愛嘅南極白色世界,好唔捨得!





快艇離開咗郵輪喇,開始見到大型浮冰同企鵝。呢次未成功影到企鵝住,因為快艇高速行緊,企鵝又高速游緊,只能影到鬆郁朦喇!


見到個基地,zoom吓先。


快艇走咗入好多浮冰嘅海域,見到有群企鵝喺海度,於是停船俾我哋影,今次終於成功影到喇!





快艇繼續喺滿佈碎冰嘅海面游弋,但船速減慢咗好多,因為驚啲冰傷到船身。









見到上圖遠方舊大冰前有隻小海豹嘛?快艇慢慢駛過去。





開心嘅時間過得特別快,回航喇,見到下圖左面遠方艘郵輪嘛?













呢啲大自然嘅藝術品真係好靚,望幾耐都唔會厭,好喜歡呢種白同藍,我覺得係世界上最完美、最純淨嘅色彩。




















見多一次企鵝,見下圖,不過快艇行緊好難影。


快要完成呢個難忘嘅旅程喇,記得細個時好鍾意睇世界地圖,會將張大地圖鋪喺地下,成個人趴上去睇,各個洲有啲乜嘢國家,地圖背面印嘅國家資料都會用心去睇,睇到攰嘅時候就索性瞓喺張大地圖上面。嗰陣最吸引我嘅就係一片白色嘅格陵蘭同南極大陸,冇諗過有朝一日可以親身踏足呢兩個地方,而夢想能夠一一實現,最感激老公肯無限縱容同配合我喺旅遊上嘅任性。南極仲有好多地方未去,我一定會再嚟架,等我!


返上郵輪喇,今趟係呢個旅程最後一次用快艇,影低做記錄先。



返上郵輪後再上甲板影多轉





呢片冰海真係靚得好交關,雖然當時冇乜陽光,但啲冰係微微閃耀嘅,散發住一種柔和嘅光芒,影咗好多相,但冇一張反映到實景嗰種令人屏息嘅美!




















嘻嘻,果然有人睇實我喎,做乜玩偷拍!
曾經置身於呢個靚到好夢幻嘅白色世界,今日已經變得好遙遠,真係好唔捨得!


郵輪啟航後,天色稍為好轉,其中一邊見到藍天,如果剛才係咁,嗰片冰海一定更靚!







影低足跡先,郵輪將會向Drake Passage進發,回航阿根廷烏斯懷亞。


晚上十點幾,郵輪上有Crewshow,我沖完涼就唔願郁喇,老公去睇咗一陣,盛讚駐船醫生──下圖嗰位女士唱得好好,同啲歌星有得揮。由於郵輪上嘅工作人員唔多,所以佢哋需要身兼數職。




下篇去到郵輪尾聲,有船上活動,同埋會再經歷Drake Passage嘅風浪,跟住返抵世界盡頭──烏斯懷亞。


南極郵輪、阿根廷、巴西伊瓜蘇2016目錄頁


「Venus遊世界」總目錄


您可能會對以下博文感興趣:
加拿大白馬 傑古沙龍湖 北極熊 奧克蘭
加拿大白馬2015
冰島南部2013
格陵蘭海上看北極熊2015
新西蘭奧克蘭2014

Copyright © 2017 by Venus. All rights reserved.

10 則留言:

  1. 企鵝游水同海豚一樣咁敏捷.....

    回覆刪除
  2. 好耐無見...
    冰山真喺現場睇先至靚

    回覆刪除
    回覆
    1. 絕對係, 因為影唔出嗰種氣勢同空間感!

      刪除
  3. 我都懶左成個月呢!! 唔怕, 慢工出細貨嗎. 好難得見到企鵝游水, 南極真係好吸引.

    回覆刪除
    回覆
    1. 多謝體諒 :)
      真係好吸引, 應該係無敵級別嘅靚

      刪除
  4. 好耐無見~~掛掛你~~
    多謝你帶我睇呢片咁靚既冰海~~~~~~~
    我暫時都未有機會去到~~~~~
    好彩你舊年去左最想去既南極咋..如果唔係你今年咁忙都抽唔到時間去...嗚嗚~~~

    回覆刪除
    回覆
    1. 我都有掛掛妳呀
      嘩, 咁我都要多謝妳帶我去睇咁多地方喎
      我知妳一定會去!
      一返工就唔會去到喇, 南極夏天嘅月份我都冇長假期呀 >.<

      刪除
  5. 南極的企鵝好可愛! 跟格陵蘭比較,你喜歡邊個多D?

    回覆刪除
    回覆
    1. 超可愛, 望住佢哋會由個心笑出嚟
      呢個問答唔需要諗, 一定係南極, 因為南極冰川嘅氣勢勁好多, 格陵蘭都靚, 不過係縮影版

      刪除