2015年8月8日 星期六

美國簽證


本文只適用於香港地區的美國簽證申請人,將全篇使用廣東口語。

發文預告
今個星期除呢篇之外會多發一篇極光apps及網頁介紹,咁復活假嘅加拿大極光之旅就正式寫晒喇!

旅程預告
下星期突然好忙,因為老公個美國公務trip終於成行,我成日恨做跟得夫人同佢一齊出trip,但每次我都要番工跟唔到,今次終於跟到喇!yeah
簽證同機票都喺今個星期搞掂晒,開始覺得實在!於是我要喺出發前處理晒自己工作上嘅手尾先,仲要番公司執吓嘢,再有時間剩的話,plan吓喺老公番緊工嘅時候我可以去邊度逛,所以下星期一定出唔到blog喇,仲以為喺未有新旅程前要寫吓食評間場添,宜家唔洗lu


申請美國簽證流程

話時話,從來冇諗過自己會去攞美國簽證,若果唔係上次加拿大之旅會順便攞埋,世事真係難以預料嘅!

第一步──填表

下為申請美國簽證官網,有中文版、英文版,喺版頭右上方自己揀想睇中定英。




亦可以直接跳到以下網址填form,呢份非移民簽證表格叫DS-160



份嘢啲英文唔深,可以完全唔洗查字典亦唔洗用佢網上個翻譯,但有心理準備啲問題煩到嘔。如果想睇中文的話,喺右上角可以揀,揀完係唔會全份變中文嘅,但你將滑鼠指埋去啲字度,好似下圖咁,就會譯咗做中文。



跟住逐題做,啲題目多到無可能逐題講。呢份咁嘅form,實在係form中之極品,將你由面起到落底之餘,仲起埋你阿爸阿媽底!我從來都包辦全家嘅form嚟填嘅,雖然講唔上好鍾意填form,但一定唔抗拒,遇到呢份form中之霸,我填到失常咁大叫咗幾次,相信以後都唔可能遇到一份比呢份更煩更癲嘅form!如果你可以keep住正常狀態一氣過填晒,你EQ絕對係屬於無敵級別,恭喜恭喜!

第二步──交簽證費

填完份極品form,列印張繳費單去7-11交現金,視乎唔同簽證有唔同價格,大部份人係攞旅遊、商務簽證(即B類簽證),嗰種係160蚊美金(1280港紙),如果幾個人一齊申請,可以一齊交錢都得,到約時間見領事時要輸入16位數字交錢code,入埋同一串數字就得喇(其實個系統已經自動map埋串交錢code,如果出唔到先要入)。
唔好一交完錢就約見領事喎,因為處理收費要時間,睇下面截圖


第三步──預約簽證面談

入到去上方連結嘅版面後,要開個賬戶,然後跟指示入資料,要入護照號碼、俾錢收據上嘅16個數字,同DS-160form確認頁嘅10個數字,如果有家人一齊申請,可以一齊約見,到時一齊埋櫃位。


之前新聞報晒話美國簽證個database炒咗,變咗我哋預約見領事要等個幾月(放心,呢個係十年唔逢一次嘅情況)。另外,如果你揀個日子唔合心意,可以一得閒就登入望望,隨時有人改咗時間就會放番啲唔同日子嘅位出嚟。

第四步──見領事

香港嘅美國領事館喺中環花園道26號,纜車站附近。
礙於我係專線司機只揸幾條線,於是決定搭地鐵去到最近領事館嘅中環J2出口。經過公園,過馬路,跟住行上斜,到領事館門口已經成身汗!

過程:
  • 保安守門口,要show預約信,再嘟埋預約條碼紙就入得。
  • 上樓梯,有保安check袋。
  • 去到平台,工作人員會幫你貼label落本passport度同提你拎啲乜嘢埋counter
  • counter後,工作人員會問你去美國做乜,要交公司信俾佢,然後佢會將所有要交俾領事嘅文件成疊用橡筋箍好交番俾你,沿途不斷有工作人員提唔好拆開條橡筋。另外,呢個工作人員都會決定你之前上載嘅相得唔得,但我同老公都俾佢叫再影過,話唔係近照,其實我睇極都一樣樣,張相都唔知影咗夠唔夠兩年,我見多數人都係被叫再影過!嗰度得一部快相機,排晒長龍,美國簽證規格嘅相只得兩格,收費50蚊。貴都算喇,佢話張相唔得,你都係要侷影,最麻煩係部機只食50蚊或以下嘅紙幣,冇的話要過對面馬路花店或咖啡店唱散。就算好似我哋咁兩個人,都冇得入100蚊,要一個還一個。我哋都冇散紙要過去咖啡店唱,咖啡店職員話要幫襯先得,老公話同時間遇到個男仔都係嚟唱錢侷買樽水,於是兩個好似競飲大賽咁想拿拿林飲晒過番嚟,因為領事館係唔帶得食物同液體嘅!所以大家記住帶定50蚊紙幣,包冇衰!
  • 影完相要過番counter,有個工作人員會同你scan張相。
  • 入領事館(入到領事館過埋安檢先需要講英文,之前全部係本地工作人員。)
  • X光機同放低手機俾保安
  • counter打手指模,十隻手指都要打晒。
  • 去另外幾個counter排隊見領事,當日開咗三個櫃位,唔算private,一路排一路聽到最近嗰兩個窗啲領事問乜同啲人答乜。


當日情況:
最近嗰個櫃位個領事幾靚女,剛啱一對老夫婦埋櫃位見佢,伯伯恭恭敬敬好用心咁講出佢預先準備好嘅一句英文,表示英文唔好。個靚女領事竟然同對老夫婦講普通話,仲肯定講得好過我!

另一個櫃位嘅領事係肥肥哋可愛鬼妹,埋櫃位係一對打扮比較時髦嘅老夫婦,佢哋埋counter企咗好一陣子,我努力偷聽對老夫婦答乜,但都係聽唔清,我估可能對時髦老夫婦答唔到領事問嘅嘢,大家估之後有咩出人意表嘅事發生?!
我諗大家都估到,冇錯喇,老公同我都好清楚咁聽到個領事轉咗用唔鹹唔淡嘅廣東話嚟問問題!緊接住時髦老夫婦嘅係一位操流利英語嘅太太,聽到佢之前已經攞過visa去過美國,好快問兩句就走得,跟住到我哋喇!當中第一個較遠嘅櫃位傾咗好耐未轉過人,亦都睇唔到領事個樣;第三個轉咗普通話台嘅櫃位仍然未問完。

到我哋喇,先問我同老公係咩關係,然後問男先,問佢去美國做乜,喺呢間公司做咗幾耐,然後問我哋結咗婚幾多年,最爆笑係我同老公一齊答,但兩個答案唔同,我強調番我嘅答案先啱,隨即以凌厲眼神睥一睥老公,個肥妹領事見到咁嘅場面就喺度笑,氣氛都幾輕鬆,傾落完全唔緊張,然後又係問我做乜職業,做咗幾多年,咁就問晒喇!跟住佢即時話我哋知簽證已經獲批,同我哋確認一次攞簽證嘅方式就走得。
  • 離開領事館前喺X-ray保安度拎番手機,當日所見保安都好醒,已經主動拎定等我哋。

銀行月結、糧單、稅單、相片嗰啲完全冇拎過出嚟,不過穩陣啲都係帶定。

最後,可以去上面條連結度追蹤本護照去到邊,個美國簽證會貼落護照度。都好快呀,我哋星期一見完,星期三老公先行收到速遞,我就星期四收到。


結論係填form最煩最得人驚,其它步驟都冇乜難度。唔需要擔心溝通問題,一來問題淺;二來領事睇嚟識華語,態度亦好平易近人,只要你俾佢覺得旅程完咗會番香港,唔會留喺美國,咁就可以攞到簽證,我哋都批咗十年,如果去南美的話,唔洗專登避開美國,多啲航班選擇。

美國紐約2015目錄


「Venus遊世界」總目錄


您可能會對以下博文感興趣:
釜山 芬蘭 挪威極光 加拿大極光
釜山秋色2014
芬蘭首都及詩麗雅郵輪2011
挪威實現極光夢2012
加拿大白馬極光2015



36 則留言:

  1. 咁麻煩,想起都唔想去美國。

    回覆刪除
    回覆
    1. 完全同意, 係十級麻煩, 唔係為左做跟得夫人都唔申請呀

      刪除
    2. 1733 , hi long time no see, How Are You? 來緊都想去US , 扒文見到你^^

      Hi Venus, 請教一下, 是否不須要us家人擔保?? 因為以前是要的 (我們是旅遊)
      & interview 時 是否可以要求國語/廣東話?因為我們當中有老人定不懂英語的

      刪除
    3. Bobo, 唔好意思呀, 宜家先偶然地睇到個留言, 我諗妳家人已經搞掂晒個簽證喇 >.<
      因為我冇家人o係美國, 所以冇留意。
      至於面試時可唔可以要求, 據當日所見, 都係個領事主動轉語言, 因為我唔知係咪個個領事都識國語/廣東話, 或者可以好似對老夫婦咁, 教定佢地講英文唔好, 睇下對方會唔會主動轉語言, 如果後生o既都一齊申請就更好, 因為一齊申請可以一齊埋櫃位, 到時老人家答唔到, 後生可以幫到口

      刪除
    4. Bobo,唔好意思,我在大半件後先至睇到和回應你呀!去年9月至今年4月,我去過兩次韓國一次紐西蘭自駕遊,都好心滿意足架喇。托福身體仍健康,所以仍可以繼續上路。你呢?你去完美國又計劃左去邊處呀?等我去你個blog道睇睇先。

      刪除
  2. 我識人見得好緊張. 之前visa 批咗10年, 我都係去得一次.

    回覆刪除
    回覆
    1. 唔知係咪以前嚴格d呢, 宜家經濟差一定批得鬆。
      等緊時都緊張, 所以偷聽人問乜^^ 埋咗counter反而唔緊張
      嘩, 攞左應該去多d喎, 唔好嘥嘛 ^.*

      刪除
    2. 過期 lu. 諗起搭長途機都怕怕. 北美係仲想去黃石公園, rockies 等

      刪除
    3. 朋友話upload 個D相雖然approved, 去到就唔得。有人话令相比佢地scan, 会用得架

      刪除
    4. 黃石公園同rockies我都想去呀, 仲有niagara falls, 唔知今個trip有冇時間去後者, 都近近地new york。
      個工作人員直情冇問我地有冇帶相, 因為我地係帶定左架。佢直情話我地張相唔似, 激死呀, 又冇整過容, 成年人年幾兩年可以差得幾遠, 或者係老左自己唔覺啦 >.<

      刪除
  3. 回覆
    1. 我都係咁諗 :) 不過好似機會唔大

      刪除
    2. 嘻嘻, 我之前都係咁諗架, 完全諗唔到無啦啦會走去做簽證

      刪除
  4. 華....連你成日都填入境form既人都話填到癲....
    咁我...........................都係用番葡國護照過算喇~

    回覆刪除
    回覆
    1. 呢份野真係好煩, 問到d野連自己都唔會記得, 要夾硬諗番一d已經被年月刪除左o既記憶, 妳話救唔救命
      唔係淨係加拿大護照可以免簽?!

      刪除
  5. 攪完簽證下次咪去埋阿拉斯加囉! 唔使搵唔到個路牌~

    回覆刪除
    回覆
    1. 個路牌都好肯定係拆左, 因為個位置我o係google實景地圖再求證左n次, 不過對阿拉斯加呢個白色世界真係好有興趣 ^^

      刪除
  6. 我想問下你交完費用,係咪要等成個月先見到領事?

    回覆刪除
    回覆
    1. 放心呀,剛啱我嗰期因為美國簽證系統出咗問題,變咗要清番之前積壓咗嘅申請者先,所以先要成個月先見到領事,聽聞正路係交錢後一兩個星期

      刪除
  7. 我英文不好, 很擔心面試一定要用英文, 到時答不好, 簽不到就浪費了機票和酒店費用, 謝謝你的文章, 對我很有用!

    回覆刪除
    回覆
    1. 唔洗客氣, 希望您面試順利 ^^

      刪除
    2. 謝謝分享,無呢篇分享都可能吾準備公司信去見官
      因為我要去加拿大,結果貪便買了去美國轉機,自己本身又吾知去美國轉機都要簽證
      1:想問呢個理由經美國可以嗎
      2:請問公司信格式有咩要求,應該點打先得

      刪除
    3. 唔洗客氣 :)
      1. 經親美國都要有美國visa呀, 就算唔離開禁區都要攞 >.< 但有一種叫transit visa(http://www.ustraveldocs.com/hk_zh/hk-niv-typecandd.asp), 不過如果冇記錯, 價錢係同美國旅遊簽證一樣價嘅, 所以不如申請番旅遊簽證。
      2. 放心, 好common架咋, 公司應該有晒格式喺度。大概係證實你喺呢間公司做, 幾時入職, 職位係乜, 月薪幾多, 公司批出嘅假期由邊日至邊日。你可以上網search吓, 有啲人寫埋範本放上網。

      刪除
  8. 已經整左c1,過境簽證
    叫左公司整公司信,吾知趕吾趕得切比我。
    星期五就要去見,如果無公司信。可能就拎合約同銀行月結單去。希望可以過到骨。
    希望到時可以分享過骨心得

    回覆刪除
  9. 😂都系過唔到,話我去加拿大都系直接去好d

    回覆刪除
    回覆
    1. 吓, 未聽過唔得架喎, 因為未攞到公司信?!

      刪除
  10. 我帶左僱傭合約去,😂又無叫我比收入證明,就話吾批

    回覆刪除
    回覆
    1. 咁早知約遲啲見, 等埋封公司信先 >.<

      刪除
  11. 取消埋機票,損失八千😤😥

    回覆刪除
    回覆
    1. 我諗我會自show所有證明說服佢
      之前見加航有出promo, 希望你搵到平機票leverage番

      刪除
  12. HI,我同朋友都填左DS160同交左錢,衣加約左期等見官。
    衣加處理速度好似快左好多,入數既話,今日4:50前入,當晚11:00後激活。
    我地今日晏晝1點入數,夜晚9點幾就收到EMAIL話激活左。
    同埋約見官既日期最快可以2月3,都幾有效率。
    希望順順利利拎到VISA /W\

    回覆刪除
    回覆
    1. 祝一切順順利利呀 ^^
      多謝補充最新資料!

      刪除
    2. 今日去見左領事,早左去排隊,檢查完資料同過安檢後,等領事開工。
      排到過去個"銀行COUNTER",問左D簡單問題唔夠3分鐘,乜資料[我帶左去既公司信、機票、行程之類]都冇睇,就話批比我啦,勁快勁順利!
      多謝哂妳既資料同教程^^

      刪除
    3. 恭喜晒呀, 唔洗客氣, 寫blog就係做sharing方便大家嘛 :)

      刪除
  13. 你好 .好開心睇列你用心分享 寫得好詳盡. 我想問如果我工作咗哩間公司唔係好耐.但有part time 讀夜校証明, 我係怕到時候俾戶口證明,出糧好少,驚唔過🙏🏻🙏🏻

    回覆刪除